Gipusil sa nag-helmet

Usa ka 21 anyos nga lalaki ang gipusil patay susama sa vigilante style killing sa duha ka wala mailhing tawo nga nagsul-ob og helmet samtang naglingkod ang biktima daplin sa dalan uban sa iyang usa ka higala sa miaging gabii pasado alas 11 diha sa sitio Camagong barangay Lahug ning dakbayan.

Patay dihadiha human makaangkon og samad sa ulo ang biktimang si Bernabe Guinocor Macapobre alyas “Bobby”, first year high school sa Bo. Luz Night Hi-School ug residente sa sitio Mabunay sa maong barangay.

Gitumbok ang duha ka wala mailhing tawo, chubby ang panglawas ug gibana-banang nagpangidaron og 25 anyos, 5’7” ang gitas-on, ang usa nagsul-ob og kolor blue polo shirt samtang ang ikaduha nagsul-ob og kolor dark shirt ug nag-helmet.

Ang Mobile Patrol Group maoy unang miresponde sa maong hitabo pinangulohan ni Chief Insp. Arnel Banson ug Mabolo Police Station nga si SPO3 Raul Magdadaro uban ang mga barangay tanod sa maong lugar apan  wala na nila maabti ang duha ka mamumuno.

Sa gihimong imbestigasyon ni SPO2 Rey Cuyos ug mga kaubanan sa Homicide Section nasayran nga kuyog sa biktima ang higalang si Carlo Maputol dihang naagian sa mga mamumuno nga niadtong tungura naglakaw lang.

Apan igo lang nisaylo og gamay nibalik ang usa dayong nibunot sa dala niining armas ug gipusil makaduha ka higayon ang biktima, si  Maputol daling  midagan palayo sa lugar ug nisiyagit nga nangayo og pakitabang.

Human sa maong pagpamusil ang duha ka mamumuno daling nanagan paingon sa sudlonon nga bahin sa maong lugar ug daling misakay sa nag-parking nga motorsiklo.

Sila si PO1 Clifford Mantua ug PO1 Sir Abatayo sa Car 018 sa MPG nagkanayon ilang gi-pick up ang usa ka 17 anyos  ug gi-turn over sa Homicide Section aron ipailawom sa imbestigasyon apan ang kauban sa biktima wala moila kaniya nga usa sa mga suspek.