Sikyu mitunga sa CIIB

Mipakita sa buhatan sa Criminal Investigation and Intelligence Branch ang guwardiya nga tag-iya sa identification card nga giingong nakit-an sa usa ka traysikad driver diha duol sa La Nueva Supermart duol sa crime scene diin gitulis ang armored van sa Mandarin Security Agency.

Si Jayson Dumoran, 22, lumad nga taga Cogon East sa lungsod sa Carmen miabot sa CIIB ug nakigkita kang Sr. Insp.George Ylanan aron limpyuhan ang iyang pangalan ug mamahayag kabahin sa pagkawagtang sa iyang ID.

Si Dumoran sakop sa Mandarin Security Service Inc. nga parehong buhatan diin masakop ang duha ka escort nga guwardiyang gipamusil sa mga sakop sa Bohol Robbery Group.

Si Dumoran mitug-an sa mga tigbalita nga nawagtang ang iyang ID niadto lang Biyernes sa gabii upat ka adlaw human tulisa ang iyang mga kaubanang sila si Procoro Esguerra ug Medard Rama nga maoy nikuha sa kwarta sa Metro Bank diha sa La Nueva.

Matud pa niya nagduda siyang diha sa PUJ nga iyang gisakyan kini nahagbong samtang padulong pauli sa Hipodromo diin usab siya manukad aron makauli sa Carmen.

Sumala pa niya nag-escort siya sa usa ka bangko diha sa Banco de Oro sa Fuente Osmeña maong 03B nga rota padulong sa Mabolo ang iyang kanunay’ng sakyan pauli sa Hipodromo.

Dili usab siya motuong Agosto 13 napunitan ang iyang ID sanglit iya pa kining gigamit nianang adlawa hangtud niadtong Biyernes ug dunay mga kaubanan niyang makapamatuod niini.

Nianang pagka-Sabado hangtud Lunes iya nang gipangita ang iyang ID ug nagtuo siyang nahibilin kini sa armored van nga iyang gibantayan apan nahibulong nalang siya dihang niadtong Martes migawas ang iyang ID sa usa ka balita sa lokal nga telebisyon.

Apan si Ylanan sa pakighinabi sa mga tigbalita kagahapon mitug-an nga dili sila dayon motuo sa pangangkon ni Dumoran sanglit ila karong gi-countercheck ang mga tawong gipangangkon niining makatestigos sa iyang pamahayag.

Samtang gikwestyon usab ni Ylanan nganong wala kini ipa-blotter ni Dumoran ngadto sa kapolisan nga nasayod man kini nga importante kaayo ang iyang ID.

Giklaro hinuon ni Ylanan nga dili pa suspek si Dumoran kundili ila lang kuhaan og pamahayag ingon man ipailawom kini sa polygraph test kon lie detector test.

Matud pang Ylanan ang pangangkon sa nakapunit sa ID ug ang sukwahi nga pangangkon ni Dumoran maoy hinungdan nga ila kining ipa-polygraph test.

Si Dumoran sa iyang bahin mibutyag nga uyon siyang i-polygraph test tungod kay nasayod siyang wala siya’y gihimong dautan.

Samtang sa laing bahin, laing motor nga gidudahang usa sa mga get-away motorcycle sa Bohol Robbery Group ang narekober niadtong milabay’ng gabii diha sa dalan Logarta dili layo diin marekober ang kolor pula nga motor nga get-away sa mga suspek.

Ang maong motor usa ka XRM nga kolor blue nga nagtangag og plakang IA-6340, niadtong Martes sa milabay’ng semana, narekober sa kapolisan ang XRM nga kolor pula nga may plakang IA-6346.

Ang maong mga motor parehong narehistro didto sa kaulohan ug gituuhang makatabang kini sa pagkasulbad sa maong kaso.