Responsableng tawo si Procoro

Responsable ug kugihan nga tawo ang namatay nga gwardiyang si Procoro Esguerra kinsa napusilan sa mga tulisang mitulis sa armored van diha sa tugkaran sa La Nueva sa milabay’ng seman.

Kini maoy paghulagway kaniya sa iyang mga igsuon ug sa kapuyong si Dina atol sa pakighinabi sa Banat News kagahapon diha sa St.Peter Funeral Homes diin gidala ang patay’ng lawas niini.

Si Mario, igsuon ni Procoro magul-anong misaysay sa Banat News sa kaagi nilang magsuon sa tinguha nga makahuman sa kursong Criminology ang iyang maguwang.

Matud pa niya kaniadto pa sa pagtungha niini kugihan na gyud si Procoro gani human sa klase niini kaniadto diha sa University of the Visayas manupi kini og buhok diha sa Sanciangko.

Si Mario nagkanayon nga kaniadto pa man pangandoy na niining mahimong polis apan gumikan sa kalisod nanrabaho kini samtang naghikay nga makapasar sa board exams.

Gimahay ni Mario ang mga polis diha sa duol nga wala makapakgang ni bisan nalang makadakop sa mga sakop sa Bohol Robbery Group nga mipusil sa iyang maguwang.

Samtang si Dina nga upat ka buwang buntis, ug pangasaw-unon ni Procoro nga iyang nang katipon diha sa  ilang gipuy-an sa Pardo, mitug-an nga wala siya makakita og senyales kang Procoro niadtong Lunes sa buntag nga dunay dautang mahitabo kaniya.

Matud pa niya niadtong adlawa 15 pesos ra ang kwarta niini ug gani iya pang giprenda ang iyang ATM aron lang makakuha og kwarta nga magamit nila sa balay.

Dugang pa niya dunay mga higayon nga mo-sideline og panupi og buhok si Procoro aron makadugang sa ilang pinansyal nga panginahanglan.

Samtang giangkon ni Dina nga naglisod gyud sila sa pagpangita og kwarta niadtong naa pa sa hospital si Procoro tungod sa mga palitunong mga tambal, mipasangil usab silang dugay kaayong nakaaksyon ang Mandarin Security Service Inc. sa tabang pinansyal tungod kay adto pa mananghid sa Manila sa ilang main office.

Hinuon wala nila mahaya ang maong agency tungod kay misaad silang tabangan sa paghipos sa patay’ng lawas ni Esguerra ug gipasabot sa mga doktor sa CCMC nga delikado gyud ang kahimtang niini.

Sumala pa sa mga igsuon ni Procoro nga sila si Daisy ug Maria wala gani gyud mapailawom sa CT Scan si Procoro tungod kay di mahimong tandugon ang lawas niini tungod sa kadaut diha sa iyang spinal column.

Ang mga igsuon ug kabanay ni Procoro miawhag sa awtoridad nga dalion ang pagkasikop sa mga tulisan.