Populasyon kulangon para sa 4 districts

Imposible pa ang pagmugna og upat ka congressional districts sa dakbayan sa Sugbu niining mga panahona kung ang tuohan mao ang pagbana-bana sa provincial statistics officer sa lalawigan sa Sugbu nga si Firmo Diputado.

Nasayran gikan kang Diputado nga mokapin lang sa 718 mil ang populasyon sa dakbayan base sa population census niadtong tuig 2000.

Gikan sa tuig 1995 ngadto sa 2000, ang siyudad giingong duna lay 1.77 porsiyento nga population growth rate matag tuig.

Sumala pa sa statistics officer nga kini mas ubos pa gani itandi sa national level nga dunay 2.35 porsiyentong population growth rate.

Apan niingon si Diputado nga bisan og ang national level maoy basihan, dili pa gihapon makuha sa dakbayan ang usa ka milyon nga populasyon niining tuiga.

Kini nagpasabot, nga dili pa usab mahimo ang plano ni Kongresista Raul del Mar pagmugna og upat ka distrito sa siyudad, pinaagi sa iyang ipasar nga balaudnon.

Kini tungod kay ang usa ka congressional district, nanginahanglan og labing minos 250 mil ka mga molupyo isip population requirement nga usa sa mga rekisitos.

Nidugang hinuon si Diputado nga mahatagan lang og tukmang tubag ang pangutana labot sa populasyon sa siyudad sa Sugbu human sa Popcen 2007 sunod buwan.