Habal driver gipatay

Patay ang usa ka habal-habal drayber human kini pusila dayon gitiwasan sa wala mailhing lalaking miatang kaniya diha sa bukirong bahin sa sitio Agbangon sa barangay Adlawon niadtong Sabado sa gabii.

Ang gipatay giilang si Dexter Gerongko Zanoria, residente sa maong dapit kinsa nakaangkon og samad pinusilan sa luyong bahin sa ulo duol sa dunggan ug sa kalasawan.

Matud pang PO3 Henry Orbiso, sa Homicide Section ang biktima nagmaneho sa usa ka Honda XRM nga may plakang IM-6022 uban sa usa ka 14 anyos nga batang lalaking giila lang sa ngalan nga Jorlan niadtong tungura.

Wala pa matino sa kapolisan asa dapit gikan ang duha apan sa pag-abot diha sa ngitngit nga bahin sa maong dapit kalit nga mitumaw ang suspek gikan sa kilid sa dalan ug gipusil ang biktima.

Dihang natumba gikatahong giduol sa suspek ang biktima ug giusban pagpusil hinungdan sa hinanali niini kamatayon samtang mikaratel og dagan ang batang angkas niini ug nangayo og tabang.

Ang community cop nga si PO3 Aldwin Quimbo nga maoy giduolan sa mga tawo mao nay daling miresponde sa dapit apan nagbuy-od na ang biktima ug wala nay kinabuhi.

Sumala pang Orbiso sa pakighinabi sa Banat News dunay nakuhang lima ka basiyong balas a calibre 45 ug duha ka slug diha sa crime scene samtang nakuha usab gikan sa posisyon niini ang mga papel nga dunay mga listahan sa numero sa masiao.

“Amo pang susihon kung unsa gyuy raket aning tawhana diha sa lugar kung habalhabal driver ba ni siya o runner sa Jai Alai o masiao atong susihon kung may koneksyon ba ni sa pagpatay niya,” asoy pang Orbiso.

Matud pang Orbiso ang mga kabanay sa biktima midumili paghatag kanila og eksaktong impormasyon kabahin sa pagkatawo niini gawas lang nga wala kini kontra ug buotan kini nga tawo.

Samtang wala na usab igkita sa mga imbestigador ang batang kauban sa biktima nga aron unta ilang kapangayuan og dugang impormasyon.