Tiyan sa polis nayabyab

Nayabyab ang tiyan ug giabis pa ang ubol-ubol sa usa ka polis nga miresponde sa usa ka kagubot sa hantakan diha duol sa tigbakayan atol sa usa ka pista sa barangay Alegria sa lungsod sa Tuburan niadtong Sabado. Ang suspek usa sa mga nanagsugal ang gikatahong nasuko sa pagbadlong kanila sa maong polis maong iya kining gitigbas, apan ang maong suspek napatay ra gihapon sa mirespondeng mga polis dihang misukol kini og pinusilay.

Ang polis nga namatay giilang si PO3 Mily Magallanes Regulacion lumad nga taga Ormoc ug nanimuyo na sa barangay Cogon sa nahisgutang lungsod ug maoy chief investigator sa Tuburan Police Station.

Samtang ang suspek nga napusilan ug namatay giilang si Jerry Morato minyo ug residente sa nahisgutang dapit.

Segun sa report sa Provincial Police nasayran ang biktima mianha sa maong dapit subay sa imbitasyon sa usa ka higala niini nga dunay kaso nga si Regulacion maoy gahawid.

Apan samtang sila nag-estoryahanay usa ka residenteng nakaila kang Regulacion ang miduol ug nipahibalong dunay kagubot nga nahitabo duol sa tigbakayan tungod sa panagtrokis sa mga nagsugal sa hantakan.

Ang biktima daling misusi sa dapit ug gibadlong ang mga nanag-away dayon gimandoan silang ihunong na ang hantak apan ang suspek kinsa usa sa mga nagsugal gikatahong nasuko.

Diha-diha mibunot kini og sundang dayong tigbas sa biktima makadaghang higayon hinungdan sa dakong samad sa tiyan nga nahiaguman sa maong polis.

Bisan paman sa iyang samad nakahimo pa kini pagbunot sa iyang armas ug gipusil ang suspek kaduha apan wala siya makaigo tungod kay giingong danag-danag nalang kadto sa polis.

Human mahagba si Regulacion, gikatahong giduol pa kini sa suspek dayong giabis ang ubol-ubol niini ug gikuha ang iyang service firearm dayon  miikyas sa dapit.

Sila si SPO3 Edgar Dumangon, PO3 Raul Jamero, PO2 Rommel Bangcog, PO2 Adolfo Ballovar Jr. ug PO2 Rusty Ong nga nakadawat sa alarma daling mihimog hot pursuit operation batok sa suspek ug ilang giadto ang panimalay niini base sa impormasyon nga gihatag sa mga sibilyan.

Apan inay motahan gikatahong gipamusil hinuon niini ang mga polis gamit ang armas ni Regulacion hinungdan nga napugos sila og bawos ug naigo kini sa kamot ug tiyan nga maoy nakaingon sa hinanali niining kamatayon.

Narekober sa crime scene ang armas ni PO3 Regulacion nga 9mm Beretta sangot ug sundang nga may gitas-on nga 15 pulgadas.

Si PO3 Raul Jamero nga nahinabi sa Banat News niingon nga molanat kapin sa usa ka oras ang ilang gihimong negosasyon pagkumbinsir sa suspek aron motahan.

Gitabangan pa sa mga kabanay sa suspek ang mga polis aron kini kumbinsihon apan gikatahong nagmagahi kini ug sa paggawas niini gihagit niini ang mga polis og pinatyanay.

‘Sumala pang Jamero nga nanagan ang iyang mga kauban dihang nagkaduol na sa ilang nahimutangan ang suspek bisan paman og naigo na sa kamot  ang suspek tungod kay wala madutli sa bala sa permiro nilang pusil.

Usa sa dili katuohang gihimo sa mga polis mao ang giingong paggamit nila og kan-on aron i-alkontra sa sumpa tungod sa pagtuong antingan ang suspek.

Usa sa mga residente ang mikuha og kan-on ug gipasok sa sumbohan sa M16 armalite og maoy iyang gigamit pagpusil sa suspek hinungdan sa pagkamatay niini.