Patay’ng tawo sa dagat  nailhan

Nailhan na sa kapolisan ang patay’ng lawas nga napalgan sa mga sakop sa Philippine Navy sa miaging adlaw nga naglutaw sa kadagatan sa Nalusoan Island sa lungsod sa Cordova.

Kini ang nasayran sa Banat News kang PO1 Ronald Wahing sa follow up nga gihimo kagahapon.

Matud pa ni PO1 Wahing nga ang maong patay’ng lawas giila sa mga kabanay nga iya sa usa ka Sergio Ango, hingkod ang panuigon nga usa ka mananagat nga taga Canbuhat, Buenavista, Bohol.

Dugang pa niya nga sa ilang pakisusi sa mga kabanay maoy ilang nahibaw-an nga niadto pang Agosto 15 sa buntag ang biktima nga wala mahiuli nga nanagat sa ilang dapit.

Gituohan sa mga kabanay sa biktima nga nakasugat og kusog nga huros sa hangin  ang biktima ug natikyaob ang sakayan nga giluwanan nga wala na usab igkita.

Sa nasayran nga ang mga sakop sa Philippine Navy sa Naval  Forces Central Command (Navforcen)  dili Coast Guard  nga unang nakataho nga nagbase sa Kalawisan sa dakbayan sa Lapu-Lapu maoy nakakaplag sa maong patay’ng lawas sa  miaging adlaw.

Gitugyan kini sa mga sakop sa kapolisan sa maong lungsod kinsa mipahiluna usab sa maong patay’ng lawas sa Saint Francis Funeral Home sa maong lungsod.