Patay ang usa ka lalaki human kini gitusak og dunggab sa usa ka construction worker nga nangabubho tungod sa pagdudang dunay relasyon ang biktima sa iyang kapuyo.
Ang insidente nahitabo kagahapon sa buntag diha sa Lower Acacia sa barangay Kinasang-an Pardo kagahapon sa buntag samtang ang biktima natulog pa sa bangko diha sa panimalay diin magpuyo ang kapuyo sa suspek.
Ang biktima giilang si Amhid Tuyor, 39, driver, residente sa sitio Paglaum sa barangay Mambaling kinsa nabulit og samad dinunggaban sa tibuok kalawasan.
Samtang ang suspek nga si Conrado Manimog, 29, silingan ra usab sa biktima, mitahan sa kapolisan human sa hitabo.
Sa imbestigasyon nila ni PO3 Rogelio Nedamo, PO3 Audie Pelayo ug PO2 Buenaventura Ursaiz sa Homicide Section kasamtangang natulog ang biktima diha sa bangko sa balay ni Adela Ybañez dihang gitusak-tusak kini og dunggab sa suspek.
Wala pa matagbaw ang suspek giguroy ang nagkadugo nang si Tuyor gawas sa balay ug diha giusban kini og dunggab makadaghang higayon hinungdan sa hinanali niining kamatayon.
Ang suspek mitahan ngadto sa buhatan sa Pardo Police Station kang SPO4 Jaime Repompo ug SPO1 Romeo Solon dala ang kutsilyong gigamit sa pagpatay kang Tuyor.
Si Manimog sa pakighinabi sa Banat News diha sa iyang karsel sa Cebu City Police Office miangkon sa krimeng nahimo ug mipadayag nga dugay na siyang nagdudang dunay karelasyon ang iyang kapuyo.
Matud pa niya nga mibalhin og puyo ang iyang kapuyo diha sa maong dapit gumikan usab kay putol-putol ang iyang pagpanarbaho sa mga construction firms, ug niadtong gabhiuna giadto niya kini aron kumbinsiron nga mobalik sa Mambaling.
Apan pag-abot niya sa maong dapit diha na ang biktima, nahibulong siya nganong diha ang iyang silingan ug nangangkon kini nga dunay gipangitang tawo, apan lawom na ang kagabhion niadtong tungura.
Nunot niini, gihagad sa suspek nga makig-inom sa biktima apan dangtan og pila ka gutlo giapas siya sa iyang kapuyo ug gipapauli, apan pag-abot sa balay dili kini “magpakuhit” ug tuslokon siya niini og tinidor.
Tungod niini nisamot ang iyang pagdudang dunay relasyon ang biktima ug ang iyang kapuyo maong pagkasayo sa buntag iyang gipangutana ang usa sa mga tagbalay kun duna bay karelasyon ang iyang kapuyo.
Ang iyang gipangutan-an mikumpirmar niini ug dihang iyang gipatan-aw si Tuyor nga niadtong tungura natulog pa gitumbok kini sa maong tawo nga maoy karelasyon sa kapuyo sa suspek.
Diha-diha mibunot og kutsilyo ang suspek ug gihansakan ang biktima makadaghang higayon.