Bana nga gibiyaan sa asawa milayat sa tulay

Patay ang usa ka lalaki kinsa gibiyaan sa asawa ug gituohang naghikog pinaagi sa pag-ambak sa 1st Mactan Mandaue Bridge habig  sa Barangay Pajo, dakbayan sa Lapu-Lapu kagahapon sa kaadlawon. Si PO3 Frederict Islet miila sa milayat nga si Hector Caballes, 30- anyos, taga Kabulakan, Banawa, dakbayan sa Sugbu.

Matud ni Islet nga mitugpa sa batoon ug lapok nga lugar ubos sa maong taytayan si Caballes ug ang mga sakop sa Emergency Rescue Unit Foundation (ERUF) maoy nag-ugkat niini.

Si Caballes gikatahong buhi pa dihang gidala sa Vicente Sotto Memorial Medical Center sa dakbayan  apan dili na kini makasulti hangtod nga namatay.

Sa nakuhang mga impormasiyon sa kapolisan gikan sa mga ginikanan ni Caballes, ang biktima nanghuwam pa kini og bisikleta kay moapas kini sa asawa nga gituohang mipauli sa pinuy-anan diha sa lungsod sa Cordova.

Apan dihang nahidangat si Caballes sa nahisgutang tulay kalit lang kining miambak.

Si PO3 Islet miingon nga hunas ang dagat dihang nahitabo ang pag-ambak ni Caballes hinungdan nga nalubong kini sa lapok pagtugpa niini sa ubos.

Apan si PO3 Islet mibutyag nga mohimo pa sila og dugang pakisusi sa pagsuta kun may foul play ba o wala ang kamatayon sa biktima.