Magsuon gipamusil patay

Patay diha diha ang duha ka mga magsuong gikan pa mitambong sa husay sa ilang kaso diha sa korte samtang naangol usab ang ilang inahan ug katabang dihang gipamusil sa duha ka nag-bonnet nga suspetsado sulod  sa ilang tugkaran diha sa barangay Sangat lungsod sa San Fernando kagahapon sa alas 10:00 pasado sa buntag.

Ang mga biktima nga nakaangkon og mga samad pinusilan sa ilang ulo mao ang magsuong sila si Crispin Llanto, 34, ug ang manghod niining si Manuel,32.

Samtang naangol usab ang ilang inahan nga si Evangilene, 69 ug katabang nilang si Editha Villaber nga kasamtangang nag-atiman sa ilang harden diha sa ilang tugkaran niadtong tungura.

Duha ka wala mailhing lalaking nagsuot og bonnet sakay sa usa ka kolor itom nga DT Yamaha nga motorsiklo ang gitumbok nga mipusil sa mga biktima.

Si Chief Insp. Antonino Cuyos, hepe sa San Fernando Police nga personal nga nisusi sa crime scene nagkanayon nga dead on the spot ang duha ka magsuon tungod sa samad pinusilan sa ulo nga ilang naangkon ug  gidali pagdala sa tambalanan si Evangeline ug Editha.

Matud pa sa kapolisan gikan pa sa Municipal Trial Court ang duha nga mitambong sa kasong Illegal Cutting of Trees nga ilang giatubang ug sa dihang nagmaniobra sila sa pag-parking sa gimanehong multicab sulod sa ilang tugkaran kalit nga miabot ang mga suspek ug gipaulanan sila og bala.

Nakuha diha sa crime scene ang mga basiyo sa bala sa kalibre 45 ug 9 millimeter.

Nagduda ang kapolisan nga kasungian sa yuta ang motibo sa pagpatay ug posibleng may kalambigitan kini sa kaso sa mga biktima, apan ang mga kabanay sa mga biktima nga gikuhaan og pamahayag sa mga tigbalita midumili sa paghatag og impormasyon kabahin sa kung unsay motibo sa pagpatay.

Gituohan sa kapulisan nga didto mopaingon sa bukirang barangay sa Greenhills ang mga suspetsado human sa ilang pagpamusil.