Duha ka bar gisira

Laing duha ka balay kahilayan ang gipasirad-an ni Mayor Tomas Osmeña tungod sa ubay-ubay nga mga kalapasan.

Kini mao ang Naughty Ka ug Claudia Bikini bar diha sa dalan Gov. Cuenco Avenue barangay Kasambagan dakbayan sa Sugbu gipasirad-an tungod sa rekomendasyon sa joint inspection team nga misusi sa maong mga establisamento.

Nasuta sa inspection team nga ang Claudia Bikini bar ug ang Naughty Ka nag-operate nga walay mga business permit, walay official receipt, walay health card ug hygiene ang mga kawani, walay occupational permit, walay liquor permit ug uban pa.

Ang Naughty Ka bar nahimong kontrobersyal sa nakalabay’ng mga buwan, human rondaha sa kapulisan, tungod sa malaw-ay'ng pasundayag.

Labing menos trese ka macho dancer ang nasikop atol sa maong pagpangronda  dihang kini naaktuhan sa kapulisan nga hubo nga nanayaw sa entablado.

Nasayran nga ang Naughty Ka Bar kaduha na gironda sa mga awtoridad tungod gihapon sa hubo nga pagsayaw sa mga dancer niini.

Ang labaw sa Revenue Task Force sa city hall nga si Tata Sungahid niingon nga mahimo pa hinoong makabukas og balik ang nahisgutang mga bay kahilayan.

Kini kung hingpit niining tumanon ang mga rekisito nga gikinahanglan sa dili pa ablihan pagbalik ang maong mga establisamento.

Apan posibli usab nga ang mga tagdumala niini mag-atubang og tukmang kaso sa hukmanan  tungod sa nahimong kalapasan pag-operate sa maong mga night spots.

Kahinumduman nga niadtong niaging semana, laing duha usab ka bay kahilayan sa dakbayan ang gisirad-an sa task force tungod gihapon sa susamang kalapasan.

Kini mao ang Scorpions ug Cobra bar diha sa dalan Sanciangko ning dakbayan.