Gikan  namisita sa hinigugma, ulitawo nagbitay sa kisame

Napalgan nga nagbitay ug wala nay kinabuhi ang usa ka 22 anyos nga lalaki nga gituohang naghikog pinaagi sa paghigot og pisi sa liog nga gibanting sa kisame sulod sa ilang pinuy-anan diha sa Palanas, Ronda, Sugbu.

Si Joemark Balasta, ulitawo, ug residente sa maong dapit nadiskubrehan sa iyang mga ginikanan nga patay na niadtong Lunes sa buntag,  mga alas 6:30 diha sa extension sa ilang panimalay.

Matud pang PO2 Juan Capacio sa Ronda Police Station nga nahinabi sa Banat News nga nianang adlaw'ng  Domingo pasado alas 4 sa hapon  milakaw si Balasta ug gidala ang motorsiklo sa iyang amahan.

Wala dayon makapauli sa ilang pinuy-anan si Balasta hangtud nga nianang alas 11 sa gabii sa susamang adlaw nasugatan ni Balasta ang iyang amahan didto  sa Poblacion.

Matud pa, nga gikasab-an sa amahan si Balasta sa wala niya pagpauli og sayo lakip na ang motorsiklo nga maoy   gigamit niini ug posibleng nasilo sa iyang amahan.

Sumala pa ni PO2 Capacio nga gibilin ang motorsiklo sa amahan ug nananghid ang naulahi nga mamisita sa iyang hinigugma sa   barangay Candoling.

Nakita nalang sa mga ginikanan nianang pagka-buntag sa adlaw'ng Lunes nga nagbitay na si Balasta ug gihigtan ang liog ug gibanting sa kisame.

Narekober sa kapolisan sa patay'ng lawas ni Balasta ang litrato nilang manag-uyab diin gipasalup-itan sa pisi diha sa iyang liog.

Dugang nasayran ni PO2 Capacio nga si Balasta putongon, medyo hilomon ug dili pirmeng magtingog-tingog. — Rey B. Pasaporte