Kargador gipusil patay

Patay ang usa ka kargador human pusila sa gikainom nga laing kargador niadtong Domingo sa gabii pasado alas onse diha sa Ilihan, Tabogon.

Samdan sa dughan ang biktimang giila nga si Simeon Monleon Pelit, hingkod ug residente sa Sitio Cadangas, Ilihan.

Samtang ang nipusil sa biktima giila usab nga si Ronnie Monteron, 26, taga sitio Dunghoy, Labangon ug temporaryong nagpuyo sa Sitio Cadangas.

Matud pang SPO1 Aniceto Manloloyo, deputy sa Tabogon Police nga nahinabi sa Banat News kagahapon mibutyag nga nag-inom ang biktima ug suspek uban sa ilang mga higala.

Sa tanto nilang panag-inom nitumaw ang panaglalis nga misangko sa pagsinumbagay sa duruha.

Sumala pa ni SPO1 Manloloyo nga nidagan ang biktima ug nisunod usab ang suspek apan gihapit og kuha ang armas nga .22 magnum revolver nga gibilin sa daplin ug gipusil ang biktima kaupat ka higayon apan usa ra ka bala ang nakaigo diha sa dughan nga maoy nakaingon sa hinanali niining kamatayon.

Nasayran nga dunay karaang panagbangi ang biktima ug ang suspek.

Ang suspek nadakpan sa miresponding kapolisan ug ang armas nga .22 revolver dunay upat ka kabhang ug usa ka buhing bala sulod sa chamber.

Matud pang SPO1 Manloloyo nga ila nang gidala kagahapon didto sa siyudad sa Bogo si Monteron aron pormal nilang gipasaka ang kasong homicide batok kaniya.