Graphic artist gikawatan

Mikabat sa dul-an sa P60 mil ang kantidad sa mga butang ug alahas nga nadala sa wala mailhing kawatan kinsa milungkab sa balay sa graphic artist sa usa sa lokal nga pamantalaan niadtong  Lunes sa hapon diha sa Lemon Ville, Sitio Uldog, Barangay Poblacion dakbayan sa Talisay.

Ang biktima giila sa mga polis nga si Jillian Christine Cruz, 25-anyos, residente sa nahisgutang lugar.

Base sa imbestigasyon sa kapolisan nga wala diha sa iyang balay si Cruz tungod kay mitrabaho kini misulod ang suspek ug gipanguha ang iyang mga butang.

Pag-abot ni Cruz gikan sa trabaho nakugang kini tungod kay natangtang na ang screen ug ang jalousy nga bintana sa kusina sa iyang balay diin gituohan nga didto miagi ang kawatan.

Nadala sa kawatan ang Cannon nga digital camera nagkantidad og P9,950, duha ka silver nga bracelet P2,600, usa ka wedding ring P4,500, usa ka antique nga diamond ring P10 mil, usa ka parisan sa Chinese gold nga ariyos P2,500, tulo ka gold nga kwentas nga dunay mga pendant P30 mil, duha ka silver nga kwentas P3 mil ug usa ka gold nga bracelet P5 mil.

Ang kapolisan mipahigayon og follow-up nga imbestigasyon sa maong hitabo.