Pagwagtang sa RTWPB gisupak ni Edu Rama

Supak si Cebu City Councilor Edu Rama nga wagtangon ang Regional Tripartite Wages and Productivity Board kon RTWPB-7.

Ang konsehal nga maoy chairman sa Committee on Labor and Employment sa City Council niingon nga mahinungdanon ang papel sa maong institusyon.

Kini sama sa pagtan-aw sa kaayuhan sa mga mamumuo ilabi na sa pagtakda sa minimum ug umento sa suholan.

“I think RTWPB-7 is doing its job in the past years, almost every year man gani siguro duna may increase” sumala pa ni Rama.

Napakyas hinuon pagtakda og umento sa suholan ang RTWPB-7, atol sa deliberasyon niini sa niaging semana.

Kini ang hinungdan nga nanawagan karon ang pipila ka grupo sa mga mamumuo nga kini wagtangon na tungod sa giingong ka-inutil niini.

Apan masaligon si Rama nga mag-convene pag-usab ang mga sakop sa wage board ug mahatagan ra og umento sa suholan ang labor sector.

Wala hinuoy pagtuo ang konsehal nga mahatag ang 125 pesos o ang 136 pesos nga across the board wage increase nga gipangayo sa duha ka labor group.

Alang ni Rama, nga dako ra kaayo ang maong gipangayo nga umento, ug kung kini ipugos paghatag ngadto sa mga mamumuo nabalaka ang konsehal nga daghang kompaniya ang manira.

“Mao nay kuyaw kay ang posibilidad ana mawad-an na hinuon og trabaho ang labor sector kung ang employer dili gyud kahatag sa maong kantidad,” nagkanayon ang konsehal.

Awhag ni Rama ngadto sa nagkadaiyang labor group nga gamay lang pailob ug pasensiya ug dili modangop sa pag-welga.

Kini tungod usab sa nasayran sa konsehal nga daghan nang export company nga nanira mugna usab sa giingong paglig-on sa balor sa peso.