Usbaw nga P.50 may bendisyon sa Palace

Wala nay mahimo ang publiko aron mababagan ang plano nga usbaw nga P.50 sa plitehan sa public utility jeepney tungod kay may bendisyon na kini sa Malacañang.

Matud pa ni OIC Regional Director Reynaldo Elnar sa Land Transportation Franchising Regulatory Board (LTFRB-7) nga mao pa kini unang higayon diin nag-una ang Malacañang sa plano sa umento sa plitehan sa mga sakyanang pasaheroan  dinhi sa Kabisay-an.

Ang komendasyon  gikan ni Presidential Assistant Ariel Lim, pangulo sa public transport affairs sa  buhatan ni Presidente Gloria Macapagal Arroyo.

Ang gihimong basehan ni Lim mao ang padayong pagsaka sa presyo sa petrolyo.

Si Elnar nga bag-o lang naabot gikan sa Manila nakalitan dihang nasayran niya aron pirmahan ang petisyon kalabot sa sugyot nga umento.

Ang maong lakang makaayo matud pa ni Elnar aron  dili na bug-at sa mga drayber ang pagpaabot nga aprobahan sa LTFRB ang unsa mang pitisyon nga ilang isang-at nga may labot sa umento sa plitehan.

Busa iyang giawhag ang mga operator ug drayber sa PUJ pagsang-at dayon og pitisyon bahin  sa umento  sa iyang buhatan.