Ex-con giluba sa tiguwang

Patay ang usa ka ex-convict human dunggaba sa tigulang nga mangingihaw og baboy tungod sa pagdukol niini sa ulo sa suspek dihang iyang gibalibaran sa gitunol niining tagay sa giinom nga bino sulod sa merkado publiko sa miaging gabii pasado alas 6 diha sa Poblacion Moalboal.

Ang gidunggab ug namatay dihadiha giila nga mao si Virgilio Lumangtad, 42, minyo, ug residente sa Tunga, sa sama nga lungsod.

Ang gitumbok nga midunggab sa biktima giila sa kapolisan nga si Cirilo Timtim, 61,taga Candabong.

Nasayran si Lumangtad nakagawas gikan sa Muntinlupa sa milabay’ng Agosto sa miaging tuig human serbisyohe ang kasong murder nga iyang giatubang sa pagpusil patay sa usa ka polis.

Matud pang PO2 Emerito Sansan nga nahinabi sa Banat News nga hubog nang daan ang biktima nga nakig-inom sa iyang mga higala hangtud nga kini gibiyaan sa iyang mga kauban ug siya nalang usa.

Pagka taodtaud naagi ang suspek ug gitawag sa biktima ug gitagayan apan gibalibaran siya niini hinungdan nga nasuko ang biktima dayon  gidukol ang suspek.

Sa kalagot sa suspek giibot niini ang kutsilyo nga gitak-in dayong hansak sa biktima kaduha ka higayon.

Si Lumangtad nakaangkon og samad sa tuong abaga duol sa liog ug dughan diin naigo ang kasingkasing niini nga maoy nakaingon sa hinanaling kamatayon.

Dugang nasayran sa kapolisan ang biktima ug ang suspek duna nay panagbangi tulo na ka semana ang nakalabay.

Si Timtim kasamtangang gitanggong sulod sa detention cell sa Samboan human mitahan sa kaugalingon.