Briton ug iyang uyab gikawatan

Usa ka British national nga kaslunon sa hinigugmang Pilipina ang gikawatan sa sulod sa ilang gipuy-an ug gisakiyo ang mokabat tunga sa milyon nga kantidad sa mga alahas ug salapi lakip ang ilang wedding ring.

Ang pagpangawat nahitabo alas 10 pasado ang takna sa miaging gabii sa sitio Mahogany, barangay Canduman, dakbayan sa Mandaue.

Ang biktima mao si Estephane Tomp, 47 nga nagpuyo sa maong dapit uban sa iyang hinigugma nga si Mea Ara Aresgado, 26 anyos nga  dalaga nga pakaslan niini sa sunod semana.

Si SPO3 Wilfredo Rodriguez nga gikahinabi sa Banat News miingon nga gilungkab ang birha nga kabilya sa bintana sa panimalay nga gipuy-an sa duha.

Ang mga butang nga gisakiyo sa wala hiilhing kawatan mao ang naglakip sa laptop computer, duha ka Nokia cellphone, Olympus nga camera, 800 pounds nga salapi, P35,000 nga Philippine money, bracelet nga bulawan ug duha ka wedding ring nga bulawan nga ang tanan gibanabanang P500,000 ang kantidad.

Si SPO1 Rodriguez miingon nga milakaw  ang langyaw sa gipuy-an niining panimalay kuyog sa pangasaw-onon niining hinigugma ug sa pagpauli maoy namatikdan nga gilungkab na ang bintana ug nahanaw na ang maong mga butang sa biktima.