Duna pay laing mga pagpanulis nga moigo

Dugang mga pagpanulis sa dakbayan sa Sugbu ang gipaabot ni Mayor Tomas Osmeña nga mahitabo.

Kini hangtud mailhan ug madakpan ang mga suspetsado nga nitulis kagahapon diha sa La Nueva-City Hall.

Nagtuo ang mayor nga usa ka organisadong mga tulisan ang nihimo sa maong krimen ug angayan lang nga magbantay ang posibleng mga target niini.

Gani matod ni Osmeña nga sa ingon niini nga operasyon, kini giplanuhan og husto gawas sa maayong pag-finance.

Gipadayag sa mayor nga mahimong dili taga Sugbu ang mga tulisan, apan dako ang pagtuo niini nga duna kini local contact nga maoy nagplano ug naggasto.

“So we should really be on alert particularly all those banks and certain retail operations.” Suma ni Osmeña.

Subay niini gipahibawo sa mayor nga libre na ang pag-subscribe sa Mobile Alarm Remote System kon MARS sa city hall alang sa mga financial instutitions.

Duna untay dos mil pesos nga monthly subscription fee ang MARS apan suma ni Osmeña nga way bisan usa nga ni-subscribe niini.

“Maybe they have number of reasons but the biggest one is they would rather be robbed, they don’t like the police to respond while the robbers are still at the bank,” matud ni Osmeña.

Karon nga libre na ang pag-subscribe sa MARS system, wala nay nakitang rason ang mayor nga dili mopahimulos niini ang nagkadaiyang financial institution sa siyudad.

Giangkon hinuon sa mayor nga dili garantiya ang MARS system nga malikayan ang mga kaso sa pagpanulis sa dakbayan.

Labaw nang gipadayag niini nga dili usab mapugos ang mga bay patigayon sa siyudad pag-subscribe sa nahisgutang sistema.