Kano gibunala'g tubo, gitulis sa higala

Usa ka American national ang nalandig sa tambalanan human kini bunali og tubo ang ulo ug pagkahuman gikuha ang kuwarta ug cellphone sa iyang kaubang Pilipino sulod sa giabangan niining pension house niadtong Sabado sa kaadlawon diha sa Bagumbayan  II,  Maribago siyudad sa Lapu-Lapu.

Maoy namat-an sa biktimang si Robert Tartaglione, 45, usa ka American national nga nagkadugo na iyang ulo ug nawagtang na ang iyang 2,000 dolyares ug Nokia cellphone model N95.

Ang gipasanginlan  sa biktima mao ang iyang higala nga giila nga si Ernie Limbaga, nga taga Barili, Cebu.

Segun sa report ang insidente girespondihan sa  Mobile Patrol  Car No. 15 pinangulohan ni SPO1 William Pascua ug pagkataudtaod ang mga sakop sa Emergency Rescue Unit Foundation (Eruf) maoy  midala sa biktima sa Mactan  Doctor's Hospital.

Sa gihimong pakisusi sa kapolisan ug segun usab sa asoy sa biktima  nga niadtong Biyernes sa hapon pasado alas 3  mi-check-in ang biktima sa usa ka pension house nga nahimutang sa maong dapit.

Apan pagka alas 11 sa gabii sa susama nga adlaw ang iyang higala (suspek)  miabot ug  misulod sa kuwarto sa iyang  giabangan.

Matud pa ni Tartaglione pasado alas 11 pareho silang nakatulog ug nahinanok pag-ayo sulod sa lawak.

Pagkabuntag alas 5:30 sa Biyernes ang biktima nakamata ug nagkadugo ang ulo apan sa iyang pagtan-aw sa pikas higdaanan ang suspek nahanaw na lakip ang dolyares ug cellphone.

Ang scene of the crime operative (Soco)  nakarekober ug metal pipe dunay electrical tape sulod sa kuwarto nga gibutang ilawom sa kama sa biktima nga nagkadugo.

Ang kapolisan sa Lapu-Lapu padayon  sa  ilang follow-up operation sa pagpangita sa suspetsado.