Usa ka 300 pounder nga vintage drop bomb sa mga Amerikanhong sundalo nakuykoyan sa operator sa backhoe diha sa construction site sa sulod sa compound sa University of San Carlos Main Campus kagahapon sa hapon.
Ang maong bomba diha makuykuyi sa gikubkob aron butangan sa pundasyon sa himuong Law and Business School sa maong unibersidad.
Ang mga sakop sa Special Weapons and Tactics daling misusi sa dapit ug diha na nila makit-i ang maong bomba pag-abot sa gibana-banang upat ka tiil ang gilawmon dihang kini naigo sa scoop sa maong heavy equipment.
Matud pa ni PO3 Danilo Rosales, bomb specialist sa SWAT, sa pakighinabi sa Banat News nga swerteng wala kini mobuto sanglit wala na kini safety pin ug sa bisan unsang orasa o ba kaha mapantok kini posible kining mobuto.
SPO1 Renante Nioda sa SWAT mitug-an sa Banat News nga mobuto pa ang maong bomba ug delikado kini kung dili ma-diffuse.
Ang maong bomba gibana-banang dul-an 4 ka tiil ang gitas-on sa lawas ug may kapin usa ka tiil nga gibag-on ug duna kini sulod nga 300 pounds high explosive sama sa trinitrotoluene (TNT).
Ang susamang bomba ihulog sa mga abyong panggubat aron buntugon ang mga kaaway ug mga edipisyo. Wala na kini tail fin ug gikaon og taya ang tumoy sa simod sa bombang nakuykuyan.
Si PO2 Benigno Andro Ilagan sa CIIB kinsa diha sa lugar atol sa pag-ukang sa maong bomba nagkanayon nga dili kini maaswat og tawo maong gihiktan kini og dakong pisi ug gibira sa backhoe gikan sa bangag.
Si SPO1 Renante Nioda sa SWAT nagkanayon nga ilang pabuthon sa luwas nga dapit sa lungsod sa Minglanilla ang maong bomba tungod kay talandugon na kini.