Resulta sa survey sa kurapsyon sa Lapu' ipagawas

Gikatakdang ipagawas sa sunod semana sa Mactan Island Chamber of Commerce and Industry (MICCI) sa dakbayan sa Lapulapu ang resulta sa survey nga gitumong sa pagsuta sa gidaghanon sa mga kumpanyang nabiktima sa mga kurakot nga ahensya sa gobiyerno.

Si Oscar Canton, bise presidente sa MICCI mipadayag niini atol sa Kapihan sa Kape de France sa Marina Mall dakbayan sa Lapulapu.

Matud pa niya usa ka independenteng pundok nga nagbase sa Manila ang nihimo sa maong survey. Giingong 80 porsiyento sa mga negosyante sa Lapulapu ang mitug-ang nabiktima sa kurapsyong binuhatan sa mga ahensya sa gobiyerno.

Sagad sa mga respondents mitug-an nga diha sila kurakuton pagproseso sa mga dokumento sa iyang negosyo.

Subay sa maong survey ang mga negosyante mitug-an nga P50,000 ang labing ubos nga kantidad nga ilang mahatag ug P10 milyones ang labing taas nga kantidad nga ilang mahatag sa mga kurakot nga mga ahensya.

Laing sakop sa MICCI nga si Atty. Amay Ong Vaño sa iyang reaksiyon mipadayag nga angay unta nga magtinabangay ang  kagamhanan ug mga magpapatigayon.

Matud pa niya adto unta gamiton ang dagkong buhis nga gikuha gikan sa mga magpapatigayon ngadto sa mga programang mabulahan ang kinabag-an.