'Paburot' sa abuno sa Talisay nadiskubrehan

Nadiskubreban sa Commission on Audit nga ang gigasto nga P2.9 milyones para sa liquid fertilizer gipaburotan og P2.3 milyones ang dakbayan sa Talisay.

Si Mayor Socrates Fernandez nagkanayon nga ang siyudad igo lang midawat sa maong fertilizer nga gihatag sa nasyonal nga kagamhanan niadtong tuig 2005.

Ang 3,071 ka botelyang fertilizer giapod-apod ngadto sa mga mag-uuma sa siyudad.

Giinsister sa mayor nga dili ang dakbayan maoy mipalit niini kundili ang nasyonal nga kagamhanan.

Apan sumala pa sa COA, ang dakbayan gilatid nga makadawat sa P3 milyones nga Priority Development Assistance Fund (PDAF) aron maoy ipalit sa maong mga liquid fertilizers.

Sa pagpamalit og mga abuno aduna pay gipahigayong public bidding sa siyudad kinsa ang Garcias Industries nga nagbase sa Manila maoy nakadaog sa contract.

Nasuta usab sa COA nga ang siyudad mipagawas og voucher nga  nagtangag sa numero 300-05-12-544 nga nagkantidad og P2,999,7000 diin gipalit kini sa 3,333 ka litrong mga abuno.

Nadiskubrehan usab nga gipaburutan og P711.90 ang matag litro nga nagkantidad lang og P900.

Dugang pa sa COA nga   ang dakbayan napakyas sa pag-canvass  sa mga presyo sa fertilizer sa lokal nga mga tindahan sanglit mas makadaginot pa unta kini.

Tungod kay base sa pakisusi sa nahisgutang ahensiya P150 lang ang presyo sa samang abuno sa COA Cluster VI-Agriculture and Environment  ug P171 sa Pacifica Agrivet base sa direktang price canvassing niadtong tuig 2005.

Nadiskubrehan usab sa Technical Services Office nga ang mga abuno nga gipamalit sa Talisay gipang-reject tanan tungod kay ang sulod niini dili mao sa gibutang sa label sa botelya.

Apan bisan paman niini gipadayon ang pag-apod-apod niini ngadto sa mga mag-uuma. Duna na lay nahibiling 262 ka botelya sa maong abuno base sa talaan sa dakbayan nga pinetsahan og Disyembre 31, 2006.