Usa ka lalaking luwan og Mercedez Benz ang milabni sa cellphone sa usa ka katorse anyos nga dalagita samtang kini naglakaw diha sa dalan Molave sa sitio Kamagong sa barangay Lahug ning dakbayan kagahapon sa kaadlawon.
Ang biktima nga midangop sa Mabolo Police station giila ni SPO1 Gaudencio Barega nga si Karen Tayao, taga Purok 3 Upper Camputhaw sa barangay Camputhaw ning dakbayan.
Samtang usa ka batan-ong lalaki nga nagmaneho sa usa ka Mercedez Benz nga kolor Gray nga nagtangag og plakang YBD-818 maoy gitumbok nga milabni sa mahalong cellphone niini.
Matud pang Barega sa Banat News, ang biktima kasamtangang naglakaw diha sa maong dapit dihang kalit nga gihunungan sa suspek ug walay daghang pasumangil nga gilabni ang gikuptang cellphone niini nga nagkantidad og P14,000.
Ang suspek dali usab nga miikyas sa wala matinong direksyon, sumala pang Barega mingaw ang maong dapit ilabi na sa maong mga takna.
Si Supt. Pablo Labra, ang kasamtangang Officer-in-Charge sa Cebu City Police Office sa pakighinabi sa Banat News nagkanayon nga iyang pabutangan og beat patrol ang maong dapit.
Matud pang Labra maong makalugar ang mga dautang elemento paghimo og salaod diha sa maong dapit tungod usab kay awaaw kini ilabi na panahon sa kagabhion diin sagad sa mabiktima mga empleyado.
Dugang pang Labra ilang subayon kung kinsay tag-iya sa maong sakyanan subay sa plate number nga nakuha sa biktima ngadto sa Land Transportation Office-7.
Daan nang namahayag ang kapolisan nga sagad sa hinungdan sa pagpanglabni kaniadto ug pagpanulis bunga sa kalisod sa mga suspek apan ning bag-uhay lang hasta ang anak sa mga adunahang tawo nalambigit na usab sa samang krimen tungod kay “tripping” lang nila o ba kaha sa pagsuporta sa ilang bisyo.
Dili palang dugay, nasikop ang mga suspek nga manglabnihay nga magsakayan og Honda Civic ug Tamaraw FX dinhi sa Sugbu nga sagad anak og mga adunahang pamilya.