Nanabo gipatay

Patay ang usa ka 37 anyos nga lalaki human pusila sa wala mailhing tawo samtang nanabo sa miaging adlaw pasado alas 2 sa hapon diha sa Malalay, Ronda gibana-banang 13 ka kilometro ang gilay-on sa Poblacion.

Gituuhan sa kapolisan nga posibleng dunay gikaatraso ang biktima ug naatol nga nag-abot kini sa kaatraso diha sa maong dapit apan naglisod ang kapolisan sa imbestigasyon tungod sa kakulang og partisipasyon sa mga tawo nga diha sa nahitaboan.

Si PO2 Juan Capacio sa Ronda Police Station nga nahinabi sa Banat News miila sa biktima nga si Samuel Gimena, lumad nga taga Bugho, Moalboal ug kasamtangan nagpuyo sa Malalay human naminyo.

Matud ni Capacio ang Malalay mopahigayon og tabo kausa sa usa ka semana ug gitunong sa matag adlaw’ng Miyerkules.

Gibutyag ni Capacio base sa ilang nakuha nga impormasyon sa pipila ka mga tawo nga ang biktima dili tig-anhaan sa tabo apan gituuhan nga posibleng mopalit og isda.

Matud pa kalit lang nibutho ang usa ka wala mailhing tawo ug gipusil sa makadaghang higayon ang biktima sa walay igong rason gamit ang kalibre .45 pistol.

Ang biktima nakaangkon og samad pinusilan sa nagkadaiyang bahin sa kalawasan lakip sa walang dughan ug nilapos sa tuo nga maoy gituuhan nga nakaingon sa hinanaling kamatayon.

Bisan og nahagba na ang biktima gitiwasan pa gyud sa pagpusil sa buko-buko ug nilapos usab ang bala sa tiyan.

Nakuha sa crime scene ang usa ka basiyo ug tulo ka deformed slug sa .45 pistol.