Erap nagtuong maabswelto

Dako ang pagsalig sa napalagpot nga pangulo sa nasud nga si Joseph Ejercito Estrada nga maabswelto  siya sa kasong plunder nga iyang giatubang sa Sandiganbayan kun ang basehan ang merito sa kaso.

Si Estrada nga gihinabi sa sibyaanang DyHP kagahapon sa buntag kusganong mihimakak sa mga pasangil sa kasong gisang-at batok kaniya ug miklaro usab nga dili siya si Jose Velarde.

Ang Sandiganbayan gikatakdang mopagawas sa desisyon karong September 15 ning tuiga human masang-at na ang kaso para sa desisyon niadto pang Hunyo 15 ning tuiga.

“Kung ang pagbabasehan ang merito ng kaso, akoy sigurado na ako’y acquitted,” asoy pang Estrada.

Matud pa niya timaan lang niini mao ang pagduol ni kanhi Justice Secretary Nani Perez kaniya ug giingong mihaylo kaniya sa pagpirma sa resignation isip presidente sa nasud ug pagawson gawas sa nasud nga walay kasong ipasaka.

Ang maong haylo wala niya dawata tungod sa kadako sa iyang pagsalig nga  gibutang-butangan lang siya og salaod ug mahimo lang niyang malimpyuhan ang iyang pangalan kung iya kining atubangon.

“I will never live this hindi ako aalis nga bansa kahit ano pang gawin nyo, I will face all those charges against me para mapatunayan ko sa taong bayan na wala akong kasalanan. If ever I am guilty I could have accepted the offer, sana tinanggap ko na lahat yung alok nila umalis na ako ng bansa,” asoy pang Estrada ug miisip sa pag-atubang sa maong kaso nga tsansa niyang panalipdan ang iyang katungod nga wala ihatag kaniya dihang gipalagpot siya sa pwesto.

“Anyone accused   must be given a day in court, I was not given that day in court during the impeachment trial,” asoy pang Estrada.

Samtang miangkon si Estrada nga di niya mapugngan ang iyang mga suporter sa pag-alsa unya kung sa higayon nga dili paborable kaniya ang desisyon sa Sandiganbayan.

Wala na say plano si Estrada nga modagan og pwesto karong tuig 2010 ug adto nalang gisalig sa mga batan-ong mga lider.