Magsuon gibanhigan sa igsuon; 1 patay

Panag-unay sa magsuon tungod sa panagbangi sa yuta mikalas og usa samtang miangol og laing usa sa dihang ang ilang igsuon ug pag-umangkon mibanhig kanila samtang paingong mamauli sa pinuy-anan gikan sa ilang umahan sa Sitio Campo, Balirong, Argao.

Ang namatay giila sa kapolisan nga mao si Danilo Gelbolingo Carsano, 48, ug samdan sa palad ang iyang igsuong si Albert, hingkod ang panuigon.

Gitumbok nga mibanhig nilang Danilo ug Albert ang ila ra usab nga maguwang nga si Bonifacio, 56, anak niining si Reynante, 26, ug lain nilang manghod nga si Henry, hingkod ang panuigon.

Sa pasiunang imbestigasyon sa kapolisan, nasayran nga ang magsuong Danilo ug Albert nagkuyog paingong mamauli sa dihang nahiagi sila sa balay ni Henry.

Igo lang nawahing ni Albert ang koral nga kawayan sa balay ni Henry, gisugat kini og tigbas ni Henry gamit ang pinoti, apan nakabantay kini hinungdan nga iyang nasagangang hinagiban ug nasamad iyang palad.

Wala makuntento si Henry, mikuha kini og .38 kalibre nga paltik nga rebolber ug gihatag ngadto kang Reynante. Ang mga saksi nagkanayon nga sa dihang nasalo ni Reynante ang armas nga giitsa ni Henry, nagpasalipod kini sa lubi dayong pusil ngadto kang Danilo makadaghan.

Si Danilo nakaangkon og pinusilan sa ulo, walang bahin sa lawas nga maoy nakaingon sa hinanali niining kamatayon.

Human sa hitabo, si Reynante ug Henry daling misibat. Apan si Reynante mitahan sa iyang kaugalingon sa panimalay ni SPO2 Mansueto Lopez sa Talaga, Argao. Si SPO2 Lopez nadestino sa Dalaguete.

Si Bonifacio nasikop sa iyang pinuy-anan sa Balirong sa grupo ni SPO1 Esteban Albuera, samtang padayong gigukod sa mga polis si Henry. Bisan wala siyay aktuwal nga partisipasyon sa krimen, si Bonifacio i-hold sa kapolisan tungod kay didto siya atol sa hitabo.

Ang kapolisan nakakuha sa crime scene sa .38 paltik nga rebolber, lima ka kabhang sa bala, .38 kalibre nga snubnose nga adunay upat ka buhing bala nga gi-turnover sa kapikas ni Bonifacio ngadto sa ilang silingan nga si Jerry Lumayag kinsa mi-turnover usab ngadto ni SPO1 Edwin Gelbolingo.

Ang namatay nga si Danilo ubos sa probation tungod sa kasong “concealing of deadly weapon” human makuhai og hinagiban atol sa kagubot nga nahitabo sa ilang lugar gumikan gihapon sa away sa yuta.

Si SPO1 Esteban Albuera nagkanayon nga nahibaw-an nila sa imbestigasyon nga ang magsuong Carsano nagkabangi gumikan sa panag-ilog sa yuta nga kabilin gikan sa ilang  katigulangan.