3 ka priso sa Liloan mieskapo

Tulo ka mga piniriso sa Liloan Police Station nang-eskapo sa milabay’ng kaadlawon, apan duha lamang kanila ang nadakpan pagbalik.

Si SPO4 Eleazar Salomon, OIC Chief sa Liloan Police Station miila sa mga mi-eskapo nga sila si Junie Maglasang, 26, ulitawo ug lumad sa Lamac, Consolacion ug adunay kasong kalapasan sa Akta Republika 8294 ug Jaime Buskit, 53, minyo ug taga Ginubacan, Catmon nga adunay kasong estafa, ug Marlon Montejo Brigole, 26, ulitawo ug taga Macatayan, Sogod Cebu nga nadakpan tungod sa paghingos og rugby.

Silang Maglasang ug Buskit ang nasikop pagbalik samtang si Brigole pabiling gawasnon hangtod sa pagsulat ning balita.

Si Buskit didto masikop nilang SPO1 Claudio Castro Jr. ug PO1 Teogenes Flores mga alas 4:00 sa milabay’ng hapon sa iyang lugar, samtang si Maglasang pormal nga mitahan ngadto sa iyang higala nga polis nga si SPO4 Danilo Marino Beneroso Berdida nga nadestino sa Police Regional Office-7 ug maoy personal nga mihatod ni Maglasang sa kapolisan sa Liloan mga alas 7 kagahapon sa buntag.

Matud pa ni SPO4 Salomon nga naka-eskapo ang tulo nila ka mga binilango pinaagi sa paggabas sa usa ka rehas sa ibabaw nga bahin sa ilang selda ug wala kini maalinggati nga migawas kini sa likod nga bahin, gumikan sa kadaghan sa mga nakadetiner.

Gimandoan na ni SPO4 Salomon ang iyang mga sakop nga naka-duty atol sa pag-eskapo nga pa-esplikahon sa nahitabo.

Matud pa ni Salomon mag-atubang gihapon og silot administratiba silang SPO3 Carlos Flores, SPO1 Claudio Castro Jr., PO2 Rotchel Jugalbot, PO2 Jaime Maroliña, PO2 Raul Flores ug PO1 Teogenes Flores Jr. nga duty officers atol sa pag-eskapo.