Bata nanion, aksidente nakapusil

Usa ka minor de edad nga lalaki  napusilan human aksidenteng mibuto ang armas sa iyang higala human nagduwa-duwa  ug gition  ngadto sa iyang ulo samtang sila naglingkod daplin sa karsada sa miaging gabii diha sa may General Maxilom Extention , Carreta ning siyudad.

Ang biktima   nga si  Ninoy (tinuod nga ngalan gipugngan) 15, ug residente sa maong lugar, napusilan nga wala tuyoa  ni Brando (tinuod nga ngalan gipugngan) 15,  suod  ni Ninoy  ug residente sa naasoy’ng lugar.

Sa pasiunang imbestigasyon ni SPO2 Rey Cuyos ug mga kaubanan sa Homicide Section sa Cebu City Police Office nasayran nga  mga alas 10:45 sa miaging gabii ang biktima ug ang suspek naglingkod-lingkod sa “pathway” sa nahisgutang lugar.

Kalit lang gition sa suspek ang dala niining  wala matinong kalibre sa armas ngadto sa biktima apan nagtuo ang biktima nga nagkomedya ra kaniya ang suspek apan nakablitan hinuon ang gatilyo sa armas hinungdan nga nibuto.

Ang biktima   daling nakadagan palayo sa nahimutangan sa iyang higala apan naigo  gyud sa bala diha sa iyang nawong.

Ang suspek mao pay mipasakay og taxi sa biktima kuyog sa laing igsuon nga lalaki pahatod sa Cebu City Medical Center.

Samtang ang suspek sa pagka-karon wala  pa  motahan sa kapolisan human wala na gyud igkita sa nahisgutang lugar ug gituohang milayas na sa ilang pinuy-anan.