Lalaking hubog giluba

Kritikal ang kahimtang sa usa ka 24-anyos nga lalaki human kini tabangi og luba sa duha ka wala mailhing drayber sa traysikad niadtong Lunes sa gabii diha sa usa ka videoke house sa Barangay Biasong, dakbayan sa Talisay.

Ang biktima giila nila ni PO2 Enad ug PO2 Joel Rosales nga si Dennis Angeles, residente usab sa maong lugar kinsa nakaangkon og mga samad dinunggaban sa tuong bahin sa dughan ug ubos nga bahin sa walang ilok ang daling gidala diha sa Talisay District Hospital apan tungod sa kahimtang niini gibalhin diha sa Vicente Sotto Memorial Medical Center niining dakbayan.

Ang mga suspetsado daling miikyas human sa maong insidente.

Si Enad ug Rosales mibutyag kagahapon sa buntag sa Banat News nga si Angeles nakainom na kining daan dihang mianha sa nahisgutang videoke house ug misalga og inom sa mga suspetsado.

Matud ni Enad nga bahalina ang giinom sa mga suspetsado ug posibleng wala makauyon niini si Angeles tungod kay gisablig kini sa biktima ngadto sa nagkanta hinungdan nga nahitabo ang lamok-lamok.

Atol sa maong lamok-lamok giluba si Angeles sa mga suspetsado gamit ang ice pick.