Kampanya vs law-ay kinahanglan lig-onon

Ang pagpalig-on sa kampanya batok sa mga law-ay nga kalihukan dinhi sa Sugbu maoy labing gikinahanglan aron kalikayan ang nahitabong pornography filming sa Olango Island  sa  miaging semana.

Kini ang gipadayag ni Dr.  Rene Joseph Bullecer nga maoy chairman sa anti indecency board sa dakbayan sa Sugbu.

Matud pa niya nga dili paigo ang pagpa-deport sa upat   ka mga Hapon nga nasakpan sa akto nga nag-sex nga gikuhaan og video.

Si Bullecer miingon nga dili mabasol ang maong mga langyaw sa ilang gihimo sanglit hayan nga unang higayon pa ang ilang pagsuroy sa Sugbu ug wala masayod nga gidili ang ilang gihimo.

Samtang si Bokal Victor Maambong miingon nga gibati og kahingangha sa pagdakop sa kapolisan sa gihimo sa maong mga langyaw.

Nunot si Maambong miingon nga sa ilang regular session karong semana  iyang ipalabang ang resolusyon nga mag-umol og anti indecency board sa kagamhanan sa lalawigan.

Gipasabot niya nga ang pag-umol sa anti indecency board gitumong alang sa pagpalig-on sa kampanya sa kagamhanan batok sa mga law-ay nga tibuok lalawigan.