Usa ka gidudahang isnatser nasikop sa usa ka traffic enforcer human kini milabni sa bulawang kuwentas sa usa sa duha ka Korean national niadtong Biyernes sa hapon pasado alas 5 diha sa may atubangan sa Lu ym Building, dalan Plaridel, Sto. Niño ning dakbayan sa Sugbu.
Wala makaikyas human gisignit sa sakop sa Citom nga si Julito Balgado ang suspek nga si Ricky Pabillar Gargolis, 23, ulitawo lumad nga taga Jimalalud, Negros Oriental ug kasamtangang nagpuyo sa Taboan public market.
Ang duha ka Korean national nga giila sa kapolisan nga sila si Kim Ji Eun ug Han Shin Hye pulos taga Seoul, South Korea ug kasamtangan nag-abang og pinuy-anan sa Lu Ym Building.
Nasayran nianang pasado alas 5 niadtong Biyernes ang duha ka langyaw nagbarug-barog atubangan sa pultahan sa nahisgutang building ug miagi si Pabillar apan iyang gilabni ang bulawang kuwentas ni Kim nga dunay crucifix nga pendant nga gilibotan og diamond nga nagkantidad og P17,000.
Si Kim misuway unta sa pagsukol kang Pabillar apan milampos gyud pagkuha sa maong butang.
Samtang si Baldago pipila lang ka metros ang gilay-on iyang nakit-an si Pabillar nga midagan paingon sa dalan Juan Luna ug iya kining gigukod nga miresulta sa pagkasikop niini.
Narekober ni Baldago ngadto sa posisyon ni Pabillar ang kuwintas ni Kim ug nakuhaan pa gyud og kutsilyo nga may gitas-ong pito ka pulgadas.
Si Baldago mao usab ang mi-turn over ni Pabillar ngadto sa Waterfront Police Station ug kasamtangan na karong gitanggong samtang nagpaabot sa tukmang kaso nga ipasaka batok niini.