Drayber sa traysikol gipusil patay

Namatay ang usa ka traysikol  drayber  human makapusil sa miaging gabii sa sitio Tiangui, Babag 1 ug eskina Kalawisan sa dakbayan sa Lapulapu, ang biktima nga iyang gikaaway   nakigbugno kaniya ug ang armas nga nailog mao usab ang giunay sa pagpusil kaniya.

Ang namatay mao si Benjamin Cabalhug, hingkod ang panuigon, minyo ug ang naangol nga napusilan usab mao si Naser Guia, 37,  ulitawo ug pulos nagpuyo sa maong dapit.

Si P03 William Humoc sa Homicide  Section nga gikahinabi sa Banat News miingon nga ang nakapusil kang Cabalhug nga si Naser nakig-inom nila ni Rosendo Oyao ug Vicente Agosto nga ilang silingan sa Kalawisan.

Matud pa ni P03 Humoc nga milabay si Cabalhug sa maong dapit ug kay silingan man kini nila maoy hinungdan nga ilang  gitawag  ug giagda sa pag-apil og inom.

Dugang pa niya nga sa dihang nakainom na ang duha kalit lang nilang nahisgotan ang karaan nilang panagbingkil nga miresulta sa panaglalis.

Si  P03 Humoc miingon nga milakaw na unta si Naser alang sa paglikay sa kagubot apan kalit lamang niining gipusil nga maoy hinungdan nga nahitabo ang pagdinumogay hangtod nga nailog ang amas nga maoy giunay sa pagpusil kang Cabalhug.