Mga tseke sa polis di na ipahatag sa loan shark

Si Cebu Provincial Police Office Director Sr Supt. Carmelo Valmoria miluwat og direktiba ngadto sa Finance Section nga magdili na sa paghatag sa tseke nga suweldo sa mga polis ngadto sa mga loan shark aron direktang mahatag ang mga tseke ngadto sa mga polis.

Atol sa press conference gibutyag ni Valmoria nga buot niyang mahunong    ang  korupsiyon sa iyang mga sakop nga naggumikan sa  dugay nang gihimo nga pagpamaligya  sa  mga tseke bisan kun layo pa ang adlaw sa ting suweldo.

Matud ni Valmoria nga dunay mga tawo nga nagpa lending apan wala kini niya ibutyag kun iya ra ba usab nga mga sakop ang naghimo niini diha sa CPPO.

Hinuon giangkon ni Valmoria nga dunay higayon nga kinahanglanon gyud kaayo ang kuwarta aron ipangbayad sa mga matrikula sa ilang mga anak.

Apan gisaway ni Valmoria tungod kay bisan og gagmay nga panginahanglanon ipamaligya lang gihapon ang mga tseke sa iyang mga sakop.

Sumala ni Valmoria nga dunay ubang mga polis nga wala ipamaligya ang ilang mga tseke kay maka finance man sila sa ilang mga panginahanglanon apan ang uban nga dugay nang nag praktis niining maong binuhatan dunay posibilidad nga manguwarta na lang pinaagi sa ilegal.

Hinuon matud ni Valmoria nga wala pa siya makadawat og report sa iyang finance personnel nga maoy nalambigit sa lending diha sa CPPO.

“Ang situation dire maoy gusto nako nga maabot sa personnel ilang tseke, as it is also their obligation to pay kun kinsa to ilang mga utanganan otherwise kun dili sila mobayad they will also be investigated,” dugang pa ni Valmoria.

Matud ni Valmoria,  sa iyang direktiba nga kinahanglan ang magpatanto og kuwarta mao na ang maningil sa mga polis ug dili na ipaagi sa Finance Section ug dili na usab patuyangan ang mga polis sa pagpautang.

“With my new directive now, this will be a way to discourage sa magpa 5-6 nga magpautang kay lisod man sab mangolekta di ba? And what I have observed this is one way to discourage them, unlike niadtong nagpautang sila nga automatic during sa paycheck makuha ra dayon nila ang tseke” dugang pa ni Valmoria.