Ginang napalgang patay sa baybayon

Napalgan nga wala nay kinabuhi ang usa ka ginang nga gituuhang naghikog pinaagi sa paglaslas sa wala nga pulso ug pagkahuman nag-inom og muriatic acid.

Nakit-an ang patay’ng lawas daplin sa baybayon pasado alas 6 sa buntag niadtong Biyernes diha sa Malabago, Badian, Sugbu.

Usa ka Serviliano Saldua kinsa kapitan sa maong barangay maoy mitaho ngadto sa buhatan sa kapolisan sa Badian.

Sa gihimong pakisusi nila ni Insp. Rodrigo Orbigozo ug Dr. Samson Dela Peña nasuta nga ang patay’ng lawas iya ni Marilou Misena, minyo, residente sa Poblacion, Alcantara.

 Nasuta ni Dr. Dela Peña nga naghikog si Misena human makit-I ang lawom nga samad sa wala nga pulso agi sa hiniwaan sa blade nga gituuhang maoy gigamit.

Nakuha nga mga ebidensya ni  Insp. Orbigozo ug Dr. Dela Peña duol sa patay’ng lawas ni Misena ang usa ka botelya sa muriatic acid nga diha pay sulod, usa ka disposable plastic cup ug  blade nga dunay dugo.

Si SPO3 Rufino Cabañag sa Badian Police Station nga nahinabi sa Banat News niingon nga wala pay nibisita sa ilang buhatan aron mosulti kung unsay hinungdan nganong nagpakamatay si Mesina.