62 porsiyento sa krimen dinhi sa dakbayan binuhatan sa minor

Sa natalang crime volume sa dakbayan sa Sugbu sugod niadtong Enero hangtud sa bulan sa Hunyo, 62 porsiyento niini binuhatan sa mga minor nga mga malapason sa balaod, lima sa maong mga kaso linoog nga krimen.

Si Cebu City Police Office director, Sr.Supt. Patrocinio Comendador  nagproblema karon tungod sa bag-ong balaod nga Juvenile Justice System nga RA 9344 nga nagmandong dili mahimong kasuhan ang mga batang nag-edad og 15 paubos.

Gidili usab ang pagbutang kanila sa bilanggoan uban sa mga kriminal ug angayan silang tabangan nga mareporma.

Apan matud pang Comendador kining maong balaura bisan maayo og tumong subay sa polisiya sa nasud ug sa international standards kun unsaon pagdala ang mga malapasong kabataan nakaapekto kini sa balanse sa tali sa polisiya sa nasud ug sa kaayuhan sa kadaghanan sa kinatibuk-an.

Sa position letter nga gipadala ni Comendador ngadto ni Senador Francis “Kiko” Pangilinan atol sa pagbisita niini dinhi duha ka semana na ang nakalabay, iyang gihulagway nga dili pa hamtong ang hustisya aron makaabay sa sosyodad ug kultura nato karon.

Base sa talaan dunay 600 ka krimen nga gikalambigitan sa kabataan niini lang tuiga, matud pang Comendador sa pagpatuman sa maong bag-ong balaod maglisod gyud ang kapolisan kung unsaon pagmentinar ang kahapsay ug kalinaw.

Gipanggamit usab karon ang kabataan sa mga drug pushers aron kung sila madakpan pabuhian man gihapon sila dayon tungod kay mga menor samtang ang mga nagsugo kanila pabiling gawasnon, dugang pa niini ang gang wars, labni, tulis, ug uban pa.

Sa wala pa mapasar ang RA 9344, kadto rang 9 anyos paubos maoy dili angayang prisuhon, apan sa bag-ong balaod 15 anyos na paubos.

Gikwestiyon karon ni Comendador ang pagpataas sa level sa edad nga dili pwedeng kasuhan tungod kay moderno na karon ang teknolohiya ug di kalikayan nga ang kabataan mas duna pay kahibalo sa ilang mga ginikanan paggamit sa mga internet diin daghan ang makat-unang dili maayo.

Sagad usab ang gipangbuhian o ba kaha nakagawas na sa prisuhan namalik ra gihapon sa ilang krimen tungod usab sa kakabus ug kakulang sa programa sa gobiyerno nga sila hingpit nga mareporma.

Matud pang Comendador, ang maong balaod naghatag og problema sa tigpatuman sa balaod tungod kay sa pagkakaron di pa gyud andam ang gobiyerno pinaagi sa ilang mga pasilidad aron kabutangan sa mga menor.

“The CCPO posits and maintains that the enactment of RA 9344 is neither to the best interest of the child nor to the community of law abiding citizens. The government and society are not well-prepared to handle programs designed to reintegrate the child-in-conflict-with-law (CICL) back to society as of this time,” asoy pa sa suwat ni Comendador.

Giawhag ni Comendador nga i-repeal una ang maong balaod o ba kaha himuan og mga transitory provisions aron mapreparar og maayo ang implementasyon niini.