Ang kanhi mayor sa dakbayan sa Mandaue nga si Dr. Restituto “Toto” Soon ang namatay niadtong miaging adlaw sa panuigon nga 88 anyos.
Si Dr. Toto Soonmaoy amahan ni 6th District Representative Nerissa Soon-Ruiz nga nahimong kanhi mayor sa dakbayan mao usab ang nahimong dangpanan sa mga kabus nga Mandauehanon nga may gihambin nga balatian.
Mahimong libre lamang ang iyang pagtambal kun ang pasyente walay ikabayad tungod sa kalisod sa kahimtang.
Dihang mi-resign si kanhi Gobernador Vicente dela Serna isip officer-in-charge sa dakbayan nga kaniadto gi-appoint ni kanhi Pangulong Corazon Aquino sa tuig 1987, si Dr. Soon maoy gihulip kaniya.
Human sa eleksyon, si Dr. Soon gihulipan sa iyang suod nga higala ug kababata nga si kanhi Mayor Alfredo “Pedong” Ouano human kini ang midaug sa piniliay sa tuig 1988.
Si Representative Soon-Ruiz miingon nga dili lang mga taga Mandaue ang mga kabus nga pasyente ang magpatambal sa iyang amahan kun dili lakip na ang gikan sa mga silingan niining lungsod.
Nunot niini ang haya sa patay’ng lawas ni Dr. Soon anaa gipahiluna sa ilang panimalay sa dalan P. Burgos sa Alang-Alang ug gidugokan na kini sa pagsud-ong sa mga Mandauehanon.
Si Kongresista Soon-Ruiz miingon nga ang iyang amahan nga maoy nagdasig kaniya nga mahimo usab nga doktor ang nagpakabuhi malipayon hangtod sa iyang kamatayon.
“We never knew that he touched so many lives. Ingon ani na diay kadaghan ang nagpangga sa among amahan,” nagkanayon si Kongresista Soon-Ruiz.