Lapu PNP kinahanglang himuong police office aron mas epektibo

Karong nahimo nang highly urbanized city ang Lapulapu gikinahanglang ibuwag na usab ang kapolisan niini sa pagdumala sa lalawigan ug himoon nang Lapulapu City Police Office matud pa ni Supt. Louie Oppus.

Sumala ni SPO1 Rodito T. Viovicente, Police Community Relation officer sa Lapulapu City Police Station nga gawas nga himoon kining LCPO, nagkinahanglan pa silag dugang 500 ka bag-ong recruit nga polis aron hingpit nga mabantayan ang kasamtangang populasyon nga mikabat nag kapin 277,000.

Si Viovicente nga nagrepresentar kang Oppus nagkanayon nga nagpadala na og hangyo si Oppus ngadto sa Camp Crame aron nga himoon nang LCPO ang kasamtangang LCPS.

Ang tinguha sa hepe sa kapolisan sa Lapulapu nga aron hingpit na silang mabuwag gikan sa pagdumala sa Cebu Provincial Police Office, matud pa ni Viovicente.

Midugang siya nga pinaagi niini, may kaugalingon nang budget unya para sa katibuk-ang operasyon ang kapolisan sa Lapulapu lahi sa pagkakaron nga ubos pa kini sa CPPO.

Matud pa ni Viovicente nga nalantawan usab ni Oppus ang nagkauswag nga populasyon sa maong dakbayan nunot sa paghugpa sa daghang industriya niini busa gipangandaman nila pag-ayo ang pagsaka usab sa crime rate volume sa maong lugar.

Busa sa pagkakaron 135 ra ka polis ang nagbantay sa 277,000 kapin ka populasyon ug layo ra kaayo sa tukmang ratio nga usa ka polis sa matag 500 ka tawo nga bantayan.