Nagtulda nalang ang mga bata sa Busay

Human sa pagkahagsa sa usa ka dakong kahoy sa tunghaan sa Busay Elementary School wala gihapon kawad-i og gana ang mga tinun-ang naapektahan pinaagi sa pagtambong gihapon sa ilang klase ilawom sa silong sa tuldang gitukod.

Si Busay barangay kapitan Leodoro Yodi Sanchez mitug-an nga nagtulda nalang ang di mominos 200 ka mga tinun-an sa elementarya nga gikan sa grade 1, 2 ug 3.

Ang edipisyo nga diin magklase ang maong mga bata maoy naigo sa punoan sa kahoy niadtong milabay'ng adlaw, wala hinuoy nasakitan kanila niadtong tungura.

Si kapitan Sanchez mipasabot nga termporaryo lang una nilang gi-suspende ang klase didto sa Bonifacio Building gumikan kay delikado pa kini tungod sa nangliki nga yuta tungod sa pagsige og uwan.

Matud pang Sanchez diha sa open ground kasamtangang gitarok ang tulda nga kapasilungan sa mga tinun-an layo sa peligro.

Si Sanchez nga nahinabi sa Banat News miingon nga gusto na gayud unta niya nga ibalhin ang mga estudyante og laing lugar alang sa elementarya ug dili na isagol sa High School ang mga classroom niini nga naa sa ubos sa bungtod nga peligro kaayo.

Gipasabot niini nga nagkinahanglan pa gayud silag igong pundo alang sa maong katuyuan ug pagpangitag maayong pwesto layo sa maong lugar.

Samtang subay niini iyang gipahibalo nga hangyoon usab niyag balik ang mga sakop sa Cebu City Disaster Coordinating Council alang sa lain na usab nga disaster drill.

Kini human wala mosaler ang ilang nakat-unan sa gipahigayong disaster drill niadtong Hulyo 20 ug 27 gumikan kay dihang nahitabo ang pagkatumba sa maong kahoy daghan sa mga tinun-an ang nag panic ug nanghilak.

Samtang si Cebu City Hall Consultant on Education Joy Augustus Young dihang nahinabi sa DyLA nipasabot nga niadto pang unang mga tuig nagkaproblema ang dakbayan sa Sugbu sa pagpangitag bag-ong luna nga kabutangan sa mga tinun-an.