Mga batang Filipino-Japanese iparehistro na

Ilusad karong Martes, sunod semana ang pagpangrehistro sa tanang mga Japanese-Filipino mga bata kun mga bata nga anak og Hapon dinhi sa Central Visayas nga gipasagdan ug wala na atimana alang sa ilang personal nga panginahanglan.

Ang Center for Japanese-Filipino Children’s Assistance (CJFCA) inabagan sa Commission on Human Rights (CHR-7) maoy nagpasiugda niini sa tuyo  nga katabangan ang maong mga  illegitimate  children nga mga Japanese national ang ilang amahan inahan.

Gitug-an ni CHR-7 regional director Alejandro Alonzo nga subay sa report nga ilang nadawat daghan ang mga illegitimate children dinhi sa rehiyon nga anak og Japanese national apan napasagdan na lang human magkabulag ang inahan niini ug amahang Hapon ug mipauli  balik sa Japan.

Kini maoy hinungdan nga gilusad sa CJFCA ang usa ka programa nga mangita og paagi pagtabang sa mga  kabataan aron matabangan kini sa ilang personal nga panginahanglan ilabi na sa ilang pagtungha.

Dunay uban nga gisuportahan apan gamay lang kaayo ang kantidad ug maglisod gani sa pagpatungha sa ilang mga anak.

Nasayran sa gihimong pakisusi sa CJFCA nga misugod ang pagdaghan sa mga bata nga Japanese-Filipino sugod niadtong dekada 80 diin daghang mga Pilipina nga  entertainers ang nanglangyaw ug namabdos didto sa Japan.

Gipahibalo ni Natividad Benedicto, field staff sa CJFCA nga ang registration magsugod sa alas 8 sa buntag karong Martes ug matapos sa alas 5 sa pagkahapon diha sa buhatan sa CHR-7 sa may dalan B. Rodriquez.