Naghikog tungod sa bulilyaso sa yuta

Naghikog patay ang usa ka ginang nga asawa sa usa ka seaman ug igsoon sa usa ka konsehal sa lungsod sa Alcantara,Cebu gumikan lang sa giiingong problemang nasinati niini sa iyang pagpangahente og yuta.

Alas 6 pasado sa buntag nakit-an na lang sa mga sakop sa kapolisan sa Badian Police Station ang patay’ng lawas sa biktima nga si Marilou Mecina, 41, didto  sa daplin sa baybayon sa barangay Malbago, Badian.

Gibutyag ni PO3 Ronald Elcana sa Badian Police Station dihang nahinabi sa Banat News nga ang kapitan na sa maong barangay nga si Silverio Saldua ang nakakita sa patay’ng lawas sa biktima diha sa baybayon.

Sa pagresponde sa mga sakop sa kapolisan ilahang nakuha sa crime scene ang usa ka botelya nga dunay sulod nga muriatic acid, blade nga nagkadugo ug upat ka lain laing klase sa suicide note ug dunay samad sa walang pulso ang biktima.

Ang igsuon sa biktima nga si Konsehal Edgar Irojo, 49, mitug-an dihang nahinabi sa Banat News sa telepono nga walay problema sa iyang bana nga usa ka seaman ang iyang manghod ug labaw nang wala kini problema sa kuwarta.

Matud niya nga ang gituohan nilang hinungdan sa paghikog sa iyang manghod mao ang pagkabulilyaso sa gibaligya niining yuta sa Poblacion, Moalboal. Giingong bulilyaso kini  tungod kay wala matarong og bahin ang komisyon niini hinungdan nga ilang nadunggan nga nakakita og away ang biktima.

Matud ni Irojo ang upat ka suicide letter nga giturn-over sa kapolisan ngadto kanila nagsentro kini sa pagpangayo og pasaylo sa iyang bana ug tulo ka mga anak ug kanilang mga igsuon ug sa ilang ginikanan tungod sa mga pagpakauwaw nga iyang gihimo.”Dearest daay and children pasayloa ko ninyo kay tungod sa akong pagpangahente og yuta daghan ang na-angin ug nauwawan bisan duna unta akoy gidawat nga allotment matag bulan,” tipik sa suicide letter sa biktima.

Matud ni  Irojo nga niadto pang Huwebes sa hapon namatikdan sa katabang sa iyang manghod nga lain na og linihukan ang biktima ug nananghid kini nga molarga paingon sa siyudad sa Sugbu, mitug-an kanila ang katabang hinungdan nga ila kining gipasundan og motor apan pag-abot nila sa Moalboal wala na nila kini igkita ug kagahapon sa buntag nabalitaan na lang nila nga patay na ang biktima.

Ang  medico legal officer sa Badian, Dr. Samson dela Peña, nipadayag sa resulta sa gihimo niining autopsy report nga walay foul play ang kamatayon niini.