Gibasol sa City Anti-Indecency Board (CAIB) ang mga lokal ug nasudnong kagamhanan sa nabulgar nga kontrobersiya may labot sa sex filming sa upat ka Japanese national sa isla sa Sulpa Island sakop sa isla sa Olango, Lapulapu niadtong miaging adlaw.
Ang chairman sa CAIB, Dr. Rene Josef Bullecer mibutyag nga wala na sila masurpresa pa sa maong kontrobersiya gumikan kay sagad gyud kini mahitabo ilabi na niadtong mga hilit- hilit nga beach resort sa mga kalungsoran tungod sa lugak nga palisiya sa gobyerno pagsumpo sa nagkagrabe karon nga pornograpiya.
Gihagit ni Bullecer ang gobyerno ilabi na ang tanang mga lokal nga kagamhanan nga panahon na nga magbutang og ‘safetynets’ aron pabiling mapreserbar ang kultura sa nasud ug moralidad.
Gisugyot niya ang pagpalabang og mga balaodnon diha sa matag lokal nga kagamhanan nga estriktong magdili ug magpahamtang og bug-at nga silot niadtong mga lokal ug langyaw’ng turista nga mopasiugda og mga law-ay’ng pasundayag sa mga publikong lugar.
Giangkon niya nga gibati siya og kabalaka nga mas mograbe pa ang mga susamang panghitabo kun walay lig-ong lakang nga himuon ilabi na kay nagsingabot na ang bulan sa Disyembre nga maoy sagad idagsa sa mga langyaw’ng turista nga gustong mobakasyon dinhi sa nasud ilabi na dinhi sa Sugbu.
Ang upat ka Japanese national nga gidakop sa kapolisan tungod sa sex filming didto sa Sulpa island naglangkob nila ni Miyawaki Yuki ug Yokomizo Masashi samtang ang ilang duha ka kauban nga nagsilbing mga cameramen naila nga sila si Isuno Hiruwaki ug Takimoto Yuchiro apan nakagawas usab dayon kagahapon human makabutang og piyansa nga tag P24 mil sa ilang kaso nga giatubang.