P4-M balor sa mga cellphone gikawat

Mikabat sa P4 milyones ang kantidad sa mga cellular phone nga nadala sa wala mailhing kawatan gikan sa usa ka tindahan og cellphonesa dalan Leon Kilat,Pahina Central niining dakbayan.

Ang maong insidente nahitabo niadtong Hulyo 30 sa gabii apan nabantayan kini niadto nang Hulyo 31 sa alas 11 sa buntag.

Ang biktima mao ang Well Gadget Cellphonenga nahimutang sa nahisgutang lugar.

Base sa imbestigasyon sa grupo sa Crimes Against Property Desk (CAPD) ug Scene of the Crime Operatives (SOCO) nga ang kawatan misaka sa atop sa maong establisamento ug gilangkat niini ang G.I. nga atop ug ang kisame nga plywood maong nakasulod kini sa tindahan.

Giligwatan sa kawatan ang steel cabinet ug gibuak ang bildo nga estante sa maong tindahan diin nahimutang ang mga cellphones.

Nadala sa suspetsado ang 1,143 ka mga cellphones sa nagkalain-laing unit, 773 kabuok niini ang brand nga Nokia, 258 Sony Ericsson, 71 Motorolla, 39 Samsung ug duha ka China models nga mga cellphone.

Ang mga sakop sa CAPD ug SOCO nakakuha na og mga ebidensiya aron masikop ang suspetsado kinsa nakita sa twin surveillance camera nga giinstalar sa sulod sa tindahan.

Ang mga nahisgutang butang gisulod sa suspetsado sa duha ka travelling bags dayon miikyas kini.

Ang kapolisan mipahigayon og follow-up sa maong insidente.