69-anyos patay human dasmagan og motor

Patay ang usa ka 69-anyos nga babaye kinsa paingon untang mokuyog sa dawn rosary human kini aksidenteng nadasmagan og motorsiklo kagahapon sa kadlawon diha sa Barangay Dumlog dakbayan sa Talisay.

Ang biktima giila sa mga polis nga si Isabel Erowa, residente sa nahisgutang lugar kinsa nakaangkon og grabeng kadaot sa lawas ang daling gidala sa Talisay District Hospital apan gideklara kini sa doktor nga patay na nga naabot sa maong tambalanan.

Ang suspetsado giila usab sa mga polis nga si Erwin Jay Lajom, 28, residente usab sa maong barangay kinsa nagmaneho sa Kawasaki nga motorsiklo nga nagtangag sa plakang OW-3189.

Base sa taho nga si Lajom maoy midala ni Erowa diha sa nahisgutang tambalanan.

Si PO2 Amelito Hornales polis sa traffic division sa siyudad mibutyag kagahapon sa Banat News nga si Lajom gikan sa Tabunok paingon na kining mopauli apan kalit lang mitabok sa karsada si Erowa hinungdan nga nadasmagan kini.

Matud ni Hornales nga nalabay si Erowa tungod sa kakusog sa impact ug nabunal kini diha sa karsada nga maoy hinungdan sa kadaot sa iyang lawas.