PopCom pabiling nag-edukar kabahin sa family planning

Nunot sa pagsaulog sa Family Planning Month, ang Commission on Population padayon sa ilang pagpahibalo ug pag-edukar sa publiko kabahin sa pagplano sa pamilya.

Si Leo Rama, director sa PopCom mibutyag kagahapon nga niining tuiga giputol na ang hinabang nga mga contraceptive gikan sa laing nasud ug nangita sila og mga paagi nga ang publiko padayon nga makaplano sa pamilya nga dili gihapon kini makagasto.

Gibutyag ni Rama nga sa census sa tuig 2000 miabot na  sa 76,000,000 ang populasyon sa nasud ug posibleng modaghan pa kini kun walay  pagplano sa pamilya.

Apan mapasalamaton ang PopCom tungod kay ang national congress migahin og P150 milyones aron ipamalit og mga contraceptives.

Matud ni Rama nga daghan ang migamit og contraceptives ikomparar sa laing paagi sa pagplano sa pamilya.

Ang PopCom adunay gitanyag nga bag-ong pamaagi sa pagplano sa pamilya diin gidawat kini sa simbahan apan nagkinahanglan lang gyud og disiplina sa magtiayon.

Kasagaran ang masugatan nga problema mao nga kun duna silay ipahigayong training o seminar sa maong pamaagi, ang motungha lang ang babaye ug wala ang bana.

Ang PopCom nakapahigayon na og training ngadto sa 130 ka barangay diin ang target nilang ma-train   niining tuiga 550 ka barangay.

Si Dr. Lutgarda Herbias  Family Planning Coordinator sa Department of Health  mibutyag nga sobra sa 80,000 ka inahan ang namatay sa tibook kalibutan tungod sa komplikasyon sa pagpanganak ug base sa ilang impormasyon 30 ka inahan kada tuig dinhi sa nasud ang mamatay sa pagpanganak.

Usa sa mga komplikasyon mao ang pag-bleeding o dugoan ang inahan, hypertension o eklamsiya, dugay ang pagbati sa inahan ug abortion.

Gawas niini delikado usab ang usa ka babaye nga manganak kung ubos sa 20-anyos ang edad ug lapas sa 35-anyos ug sunod-sunod ang pagpanganak.