Gipanghimakak sa kadagkoan sa Philippine Air Force nga wala sila magtagad sa mga nabiktima sa pagkahagsa sa Huey helicopter didto sa Sitio Humayhumay, Gun-ob, Lapulapu niadtong milabay’ng Abril ning tuiga.
Matud pa ni PAF Col. Mario Butch Lacson sa 205 THW nga nahinabi sa Banat News nga tua karon sa kaulohan nga gawas sa ilang gihatag nga hinabang sa pagpalubong ug gasto sa paghaya niini aduna usab silay gihatag nga option ngadto sa mga pamilya sa biktima.
Matud pa ni Col. Lacson ang duha ka mga tag-iya sa mga traysikol nga naguba atol sa maong insidente ila na kining gihatagan og bag-ong unit sa susamang sakyanan.
Upat sa pamilyang nabiktima ang misanong sa ilang tanyag nga usa sa ilang sakop sa pamilya pasudlon sa Philippine Air Force nga dili na moagi og training ug gani sa milabay’ng semana ila na kining gipasugod og serbisyo sa PAF.
Hinuon, matud pa ni Lacson nga aduna pay uban nga hangtod karon ila pang gihimoan og follow up sa ilang madawat nga ”compensation” gikan sa PAF human nga nagdumili kini pagdawat sa ilang tanyag.
Si PAF Gen. Arthur Mansinido, ang 205th Wing Commander nga maoy makahatag og dugang katin-awan sa maong reklamo, wala makuhai og habig sa Banat News human maputol ang pakighinabi niini gamit ang telepono ug wala na mobalik sa iyang buhatan pagkahapon gumikan kay nagduwa kini og golf bisan oras sa tingtrabaho.
Kahinumduman nga siyam ka kinabuhi ang nakalas atol sa pagkahagsa sa PAF helicopter tail 6225 sa Humayhumay Road niadtong Abril 28, 2007 diin duha ang patay sa mga piloto ug pito ka sibilyan.
Usa sa pamilyang nabiktima sa maong insidente mireklamo sa GMA-7 gumikan kay hangtod karon wala pa sila makadawat sa gisaad sa kadagkoan sa PAF.