Cebu ika-4 nga daghang kaso sa HIV

Ika-upat ang Sugbu  sa tanang mga lugar dinhi sa nasud nga dunay labing daghan sa mga kaso sa Human Immuno Deficiency Virus kun HIV  karong tuiga.

Nasayran sa Banat News gikan kang Dr. Rene Josef Bullecer sa Aids Free Philippines nga duna nay dili mominos 2,969 ka mga kaso sa HIV ang natala dinhi sa nasud subay sa labing ulahing monitoring nga gihimo niini lang milabay’ng bulan sa Hunyo.

Samtang miabot na usab og 774 ka mga kaso niini ang nahimong Acquired Immune Deficiency Syndrome (AIDS) ug duna nay 326 ang nangamatay sa maong sakit nga gihulagway’ng wala pay makaayo nga tambal.

Ang HIV mao kini sintoma sa gikahadlokang sakit nga AIDS.

Samtang gibutyag ni Dr. Bullecer nga sa maong gidaghanon dunay 1,878 niini mga lalaki ug 1,091 niini mga babaye.

Samtang 1,018 ang mga Overseas Filipino Workers (OFW’s) ug 420 niini mga seamen.

Matud ni Bullecer, 87 porsiyento niining maong sakit makuha gikan sa pagpakighilawas ngadto sa babaye ug lalaki o lalaki ngadto sa lalaki.

Ang Manila area maoy gihulagway nga dunay labing daghan sa kaso nga HIV  nga mitala og 70 porsiyento, nagsunod ang Olongapo City, ikatulo ang Angeles City ug ika-upat ang Sugbu nga dunay 157 ka mga kaso nga moabot lang og 14 porsiyento.