Oil exploration sa Bohol giundang tungod sa mga suliran

Giundang sa Nor Asia Energy Limited ang gipahigayon niining oil exploration sa kadagatan sa probinsya sa Bohol tungod sa mga suway nga pagpangilkil ug pagsamoksamok sa pipila ka mga lokal nga opisyal ug non governmental organization (NGO) sa maong dapit.

Nasayran gikan kang Engr. Ed Amante, hepe sa Energy Resource Development sa Department of Energy (DOE-7)  nga  gisamukan na ang maong kompaniya tungod usab sa kaminus sa kooperasyon sa mga lokal nga opisyal sa maong probinsya hinungdan nga nakahukom na lang kini nga mo-back out sa maong proyekto.

Matud ni Amante andam og tagana unta ang Nor Asia nga mobayad sa tanang mga mananagat ug mga nanag-iya og payaw nga ma-apektuhan sa gipahigayong seismic survey apan gisakyan lang kini sa ubang pundok  ug pipila ka politiko nga migamit sa mga mananagat aron makapangwarta sa maong kompaniya.

Giklaro ni  Amante nga nagdumili hinuon ang maong kompaniya nga ipublikar ang mga pangalan sa NGO ingon man pipila ka politiko nga nagtinguha unta sa pagpangilkil niini nga maoy hinungdan nga wala mahinayon ang maong proyekto.

Gidugang ni  Amante nga dunay sobra sa 200 ka payaw ang nadiskobrehan sa maong lugar nga maapektuhan sa maong seismic survey apan sobra sab sa katunga niini ang mga ilegal kun nabutang sa mga lugar sa dagat nga wala itugot ang payaw.

Gipasabot ni  Amante nga malampuson ug walay problema ang milabay'ng oil exploration sa kadagatan sa lungsod sa Argao ug mga silingang    lungsod gumikan sa kooperasyon sa mga lokal nga kagamhanan ug sa pundok sa mga mananagat.