Ulo sa gwardiya nalapsan og bala dihang nag-ilog sila sa armas sa iyang kauban diha sa sulod sa Sunflower City Disco Bar sa dalan Salinas Drive sa barangay Lahug kagahapon sa buntag.
Ang napusilan mao si Eric Villamor,27, residente sa sitio Baca, barangay Apas, samtang giila usab ang kaubang nakapusil kaniya mao si Romeo Egot, 25, residente sa dalan Escario sa Dignos Compound Purok 5 barangay Camputhaw ning dakbayan.
Ang duha parehong sakop sa GDS Security Agency ug nadestino sa maong diskohan.
Niadtong higayuna padulong na og pauli ang duha ug uban pang mga gwardiya dihang miduol si Villamor diha sa counter diin maglingkod si Egot samtang naglimpyo kini sa iyang tsapa.
Matud pang Egot, iyang gibutang ang iyang service revolver sa sulod sa giablihan niyang drawer dihang gipunit kini ni Villamor, apan gumikan kay duna kini bala gibadlong kini sa suspek.
Apan gikatahong wala gihapon maminaw si Villamor maong giilog kini sa suspek. Wala makabantay ang suspek nga nasulod ang iyang tudlo sa trigger hinungdan nga mibuto kini.
Si Villamor naigo sa nawong ug ang bala milapos ngadto sa luyong bahin sa iyang ulo hinungdan nga gidali og tabang ni Egot ug duha pa ka mga kaubanang gwardiya nga madala kini sa Perpetual Soccour Hospital.
Si Egot mitug-an sa Banat News kagahapon nga wala niya tuyoang makablitan ang armas dihang iyang gibawi gikan kang Villamor.