Nangulata mao hinuoy nadunggaban sa gikulata

Usa sa managsuong nangulata ug namunal og bato sa ulo sa ilang ig-agaw ang nadunggaban hinuon niadtong Domingo sa hapon diha sa barangay Tampaan Aloguinsan.

Giila ang biktima nga si Felix Neñiel, samtang ang midunggab kaniya mao ra ang iyang ig-agaw nga si Nilo Manguilimotan kinsa nalandig usab sa pribadong tambalanan tungod sa dakong samad sa ulo human gipukpok og bato sa biktima ug sa igsuon niini nga si Macario.

Ang biktima ug ang suspek nag-inom uban sa ilang mga higala hangtud mitumaw ang panaglalis tali kanila nga misangko sa sinumbagay sa duha apan giuwang ra kini.

Apan nagdumot ang biktima ug nibalik dala ang iyang igsuon nga si Macario ug dihadiha gitabangan sa pagkulata ang suspek, gipukpok pa gyud ug bato ang ulo.

Apan ang suspek nakahigayon  pagdagan paingon sa balay sa iyang amigo pero gigukod kini sa managsuon. Ang suspek adto midagan sulod sa kusina dayong kuha og kutsilyo dayon gihansakan ang kalawasan ni Felix sa makadaghang higayon.

Si Felix gihatud sa district hospital sa maong lungsod samtang ang suspek boluntaryong mitahan sa kaugalingon sa police station ug ang kapolisan maoy nidala kaniya sa pribadong klinika aron patambalan ang samad sa ulo nga iyang naangkon.